Ffocws y diweddariad hwn yw’r rhaglen Plant a Phobl Ifanc ranbarthol, y gwnaed cynnydd sylweddol arni yn y meysydd canlynol:

Rhoi’r prosiect ‘Dim Drws Anghywir’ ar waith:

Diben y prosiect ‘Dim Drws Anghywir’ yw creu un pwynt mynediad i blant a phobl ifanc y mae angen cefnogaeth lles emosiynol ac iechyd meddwl arnynt. Gweledigaeth y prosiect yw defnyddio ymagwedd ‘Cyswllt Cyntaf, Ymateb Cywir’ sy’n canolbwyntio ar yr hyn sy’n bwysig i’r plentyn neu’r person ifanc. Nod y fenter hon yw symleiddio mynediad at wasanaethau lles emosiynol ac iechyd meddwl drwy wella llwybrau atgyfeirio a chydlynu rhwng asiantaethau. Mae hyn yn golygu nad oes rhaid i deuluoedd lywio systemau cymhleth mwyach, sy’n lleihau oedi a dryswch, gan sicrhau bod anghenion yn cael eu diwallu’n gyflym ac yn briodol.

Bydd cydlynydd prosiect ymroddedig yn arwain y gwaith hwn, gan ddod â gwasanaethau iechyd, addysg, gofal cymdeithasol a chymunedol at ei gilydd. Mae’r cydweithrediad aml-asiantaeth hwn yn sicrhau y bydd plant a phobl ifanc yn derbyn cefnogaeth gyfannol ac amserol ar y cyd.

Darpariaeth Llety Rhanbarthol ar gyfer Anghenion Cymhleth:

Ar hyn o bryd rydym yn archwilio opsiynau ar gyfer datblygu gwasanaeth preswyl arbenigol newydd i blant ag anableddau cymhleth yn rhanbarth Gorllewin Morgannwg. Mae’r ymagwedd hon yn cynnig gwella canlyniadau drwy ddarparu ymyrraeth gynnar a chefnogaeth gwmpasog, gan alluogi plant i dderbyn gofal arbenigol yn nes at y cartref.

Y nod fydd cynnig lleoliadau mwy addas a digonol, gan leihau’r angen am drefniadau argyfwng neu y tu allan i’r ardal. Mae adnabod anghenion llety yn gynnar, yn enwedig i bobl ifanc sy’n pontio i wasanaethau oedolion, yn cefnogi parhad gofal a chynllunio gwell yn y tymor hir. Yn y pen draw, bydd y fenter hon yn helpu mwy o bobl ifanc i aros mewn lleoliadau gofal lleol a gwella eu canlyniadau, ac mae’n cyd-fynd â nod Llywodraeth Cymru i ddileu elw o wasanaethau gofal plant.

Mae’r mentrau hyn yn adlewyrchu ymrwymiad cryf i wella canlyniadau i blant a phobl ifanc ledled Gorllewin Morgannwg – edrychwn ymlaen at rannu’r wybodaeth ddiweddaraf â chi am eu cynnydd mewn rhifyn o’r dyddiadur yn y dyfodol.